Bilboko Begoñazpi Ikastolako, Santurtziko Calasanz Ikastetxeko eta Barakaldoko El Regato eskolako DBHko eta Batxilergoko 63 ikaslek sare adimendunek nola funtzionatzen ikasi zuten Iberdrolaren Sare Adimendunen Berrikuntzarako Munduko Zentroan (GSGIHub), Bilbon. I-DE Redes Eléctricas Inteligentes (Iberdrola Taldeko banatzailea) eta Innobasque Berrikuntzaren Euskal Agentziak antolatutako ikaskuntza‑saio hori FIRST LEGO League Euskadi prestakuntza-programaren barruan dago, eta aukera eman die parte-hartzaileei lehen eskutik ezagutzeko zentroaren ekosistema. Zentroa proiektuak koordinatzeaz arduratzen da, sare adimendunetan berrikuntza sustatzeko.
Zentroak garapenak probatu eta arintzeko zenbait laborategi ditu. Beraz, ikasleek energia-kontagailu digitalen laborategi bat bisitatu dute, eta, analogikoen aldean, aukera ematen dute urrunetik biltzeko etxebizitzen kontsumo-datuak; gainera, matxurak errazago hautematen dituzte, eta, azken finean, zerbitzu hobea eskaintzen diete bezeroei, kontsumo efizienteagoa sustatzeaz gain.
Ikasleek ezagutu duten beste laborategietako baten helburua da teknologia berriak aplikatzea prebentzioaren arloan. Laborategiak errealitate birtualeko estazio bat du, eta horrek aukera ematen dio langileari azpigeltokien formazio edo neurketak egiteko, potentzialki arriskutsua izan daitekeen toki batera joan gabe. Gainera, zentroak R0V3RT robota du, zenbait ikusmen- eta entzumen-sentsore eta sentsore termikoekin. Robota gai da eguneroko ikuskapenak egiteko azpiestazioetan, eta balizko anomaliak jakinarazten ditu.
Ikasleak Campusean ere sartu dira: zenbait tailerrek osatzen dute, eta irekita dago ikasle eta profesionalentzat. Campusaren helburua da lankidetza eta berrikuntza azeleratzea, talentua erakartzeko. Hau adierazi du Noemí Alonso GSGIHub-eko arduradunak: “aldatu egin dira sektorean eskatzen diren profil profesionalak, eta, ingeniaritza tradizionalez gain, datu-analistak eta adimen artifizialeko adituak ere eskatzen dira”.
Saioa Innobasquek 15 enpresa, unibertsitate, zentro teknologiko eta erakunderekin lankidetzan antolatu duen FIRST LEGO League prestakuntza-programaren parte da, ikasleei erakusteko zer ari diren egiten Euskadiko energiaren arloan.
FIRST LEGO League Euskadi STEAM hezkuntzako (ingelesezko akronimoa: zientzia, teknologia, ingeniaritza, artea eta matematikak) programa bat da, eta Innobasquek sustatu du Deustuko Unibertsitatearekin, Donostia Sustapenarekin eta Mondragon Unibertsitatearekin batera. Ekimena Eusko Jaurlaritzaren Hezkuntza Saileko STEAM Euskadi Estrategiaren barruan sartzen da, ikasleen prestakuntza zientifiko‑teknikoa bultzatzeko eta arlo horietan bokazioak sustatzeko.
