Askotan hitz egiten da talentuaren inguruko gerrari eta pertsonak erakundeetan gordetzeari buruz. Talentuari buruz hitz egiten dugunean, nahiago ditut lehia eta konpromiso terminoak. Lehia hobetzera, berritzera eta eboluzionatzera bultzatzen gaituen faktorea da. Eta, konpromisoa, berriz, pertsonek enpresarekiko duten inplikazio emozional eta intelektualean oinarritutako lotura. Hitzak dira, baina errealitateak eratzen dituzte. Ez dago gure esku aldatzea lanbide-profil jakin batzuetan eskaria eskaintza baino handiagoa izatea, baina gure balio-proposamena indartu dezakegu, talentua duten pertsonek gu hautatzeko eta gurekin geratzea erabakitzeko.
ITP Aeron azken urteak oso konplexuak izan dira, gure historian konplexuenak. Eta zailtasunak gorabehera, edo, beharbada, zailtasunei esker, pertsonen garapenaren eta errendimendu handiko kultura indartzearen aldeko apustu irmoa egin dugu. Halaxe aitortu du Cegos aholkularitza-enpresak, “Equipos y Capacidad” aldizkariarekin batera, ITP Aero enpresaren kultura-proiektua 2022 praktika hoberentzat saritu baitute, Estrategia eta Eraldaketa kategorian.
Besteak beste, prozesu giltzarriak abiadurarekin lerrokatu ditugu, hala nola baloreen hautapena, etengabeko feedbackaren bidez jardueraren jarraipena ezartzea, lankideak aintzatesteko eredu berri bat abian jartzea eta urruneko lana abian jartzea.
Eta aipatutako eraldaketan ezinbestekoa den ekimena zein den argi dugu: liderrak garatzeko programa. 2022an zehar barne enbaxadoreen bidez ITP Lidergo eredua 671 liderri helarazi diegu Espainian, Mexikon eta Erresuma Batuan, 3 gai nagusi hauetan eraginkorragoak izateko: Konfiantza ematea, bisioa emaitza bihurtzea eta garapena sustatzea.
Programa amaitu ondoren, gure liderrek argi dute zer espero den haiengandik, eta programa amaitu eta sei hilabetera, % 80k liderrak izateko ohiturak bereganatu edo indartu dituzte.
Liderrak dira taldeetan konpromisoa sustatzen duten pertsonak. Gallup (The Relationship Between Engagement at Work and Organizational Outcomes | 2020 Q12® Meta-Analysis: 10th Edition) aholkularitza-enpresak duela gutxi egindako azterlan baten arabera, pertsonen konpromisoaren aldagarritasunaren % 70 arduradunaren menpe dago!
Ezinbestekoa da liderrekin lan egitea, baina helburua da desberdintzen gaituen hori, gure kultura, konpainiako maila guztietan hedatzea. Horretarako, 2023an prestakuntza-saioak antolatuko ditugu bulego eta tailerretan errendimendu handiko ohitura nagusiak lantzeko, hazten jarraituko duen barne enbaxadoreen sarearen bidez.
Talentua duten pertsonak erakarri eta konprometitzeko beharrezko hiru osagai daude: Lan-eremu erronkariak sortzea, ikasteko, arriskatzeko eta berritzeko. Elkarlaneko eremuak sustatzea, askotariko taldeak eraikitzeko. Ingurune osasuntsuak sustatzea, pertsonen ongizatea helburu estrategikotzat hartzeko. Pertsonak erdigunean jartzea apustu segurua da hautatzeko eta hautatua izateko.
