Kultura eta Hizkuntza Politikako sailburu eta Eusko Jaurlaritzako bozeramaile Bingen Zupiriak, Eusko Jaurlaritzako Ekonomiaren Garapena, Jasangarritasun eta Ingurumen Saileko Eraldaketa Digital eta Ekintzailetzako zuzendari Leyre Madariagak eta Innobasque-Berrikuntzaren Euskal Agentziako zuzendari nagusi Leire Bilbaok Basque District of Culture and Creativity (BDCC) aurkeztu dute gaur goizean Bilbon, Euskadiko Kultura eta Sormen Barrutia. Plataformaren horrek kultura- eta sormen-industrietan diharduten enpresen kudeaketa profesionalizatzen eta lehiakortasuna hobetzen lagunduko du. Enpresa horiek 45.365 pertsonari ematen diete lana Euskadin, eta euskal enpleguaren % 5,31 sortzen dute. Ekimena Kultura eta Hizkuntza Politika Sailaren, Ekonomiaren Garapena, Jasangarritasun eta Ingurumen Sailaren, SPRI Taldearen eta Innobasqueren lankidetzatik sortutako plataforma da, eta Gaiak –Euskadiko Jakintza Industrien eta Teknologien Elkartea– garatuko du datozen urteetan.
BDCCren sorrera Zientzia, Teknologia eta Berrikuntzako 2030 Planean (ZTBP 2030) jasotzen da, euskal espezializazio adimendunaren estrategiaren (RIS3 Euskadi) gidalerroei jarraituz. Bertan, Eusko Jaurlaritzak kultura- eta sormen-industriak Euskadirentzat hazkundea eta enplegua sortzeko “aukera-lurralde” gisa identifikatzen ditu. Sektore horren parte dira arte eszenikoak, arte bisualak, ikus-entzunezkoak, edizioa eta inprimatutako bitartekoak, musika eta kultura-ondarea, arkitektura, artisautza, eduki digitalak, diseinua, gastronomia, hizkuntzaren industriak, moda, publizitatea eta marketina eta bideo-jokoak.
Zupiria sailburuak ziurtatu du BDCCk sektore horretako enpresetan identifikatutako erronkei erantzuna emango dieten irizpide ekonomiko-finantzarioen ezarpena sustatuko duela, hala nola ekintzailetza sustatzeko beharra, negozio-planak hobetzea eta enpresa-dimentsioa egokitzea, jabetza intelektualaren babesa erraztea, nazioartekotzea eta merkatu berrietarako sarbidea indartzea, trantsizio digitala bizkortzea, prestakuntza sustatzea, talentua erakartzea eta atxikitzea, edo laguntza eta laguntza-zerbitzuei buruzko informazioa areagotzea.
Basque District of Culture and Creativityk hauek eskainiko ditu:
- Informazio- eta orientazio-zerbitzuak, une oro sektoreko profesionalei arreta emateko prest egongo den pertsona talde bati esker.
- Sektorearen eskura dauden tresnak, modu autonomoan erabil ditzaketenak, deskarga daitezkeen aplikazioen formatuan.
- Enpresak administrazio publikoen laguntza-programetara berrorientatzea.
- Sektoreko eragile adituen eta erakunde espezifikoen zerbitzuak eskaintzea. Horiek BDCCrekin lankidetzan jardungo dute enpresa multzo bati eragiten dioten gai espezifikoetan edo problematiketan.
- Informazio eguneratua.
- Etengabeko prestakuntza irekia, kultura- eta sormen-industria guztien zeharkako erronkei erantzuteko.
Enpresa-trebakuntzen hobekuntza horretan, berrikuntzak funtsezko eginkizuna du, bai teknologikoak bai ez-teknologikoak. Hala, BDCCren eginkizunetako bat izango da kultura- eta sormen-industrien presentzia sendotzea Zientzia, Teknologia eta Berrikuntzaren Euskal Sarean, sareko lankidetza-eredu baten bidez. Eredu horretan, ekosistema horretako beste erakunde batzuek hartuko dute parte, hala nola zentro teknologikoek, unibertsitateek, administrazioek, gizarte-eragileek eta, bereziki, jarduera ekonomikoaren beste adar batzuetako enpresek. Ildo horretan, Leire Bilbao Innobasque-Berrikuntzaren Euskal Agentziako zuzendari nagusiak azpimarratu duenez, “BDCCk kultura- eta sormen-industrien mundu berri baterako sarbidea eta konexioa izan nahi du, konexio berriak, ikaskuntza berriak, harreman berriak eta, batez ere, Euskadiko KSIen sektorea egituratzeko eta bateratzeko modu berri bat ahalbidetuko du, gaur egun dena baino berritzaileagoa eginez”.
