Espainiako biztanleen %26,3k gehiegizko pisua edo obesitatea du. Ez hori bakarrik, datuek adierazten dute bi arazo horiek areagotu egingo direla gazteen artean datozen hamarkadetan, eta, beraz, neurriak hartu behar direla azkar. Horrela agertzen da Espainiako haur eta gazteen elikadura-ohiturak eta nutrizio-egoera ebaluatzen dituen EnKind azterketan. Obesitatea gaixotasun kronikoa da, konplexua eta faktore askokoa; haurtzaroan eta nerabezaroan hasten da, eta jatorria genetikaren eta ingurumenaren elkarrekintzan du, nahiz eta garrantzitsuagoa izan ingurumenari dagokiona edo jokabidea; azken batean, desoreka sortzen da ahorakinaren eta energia-gastuaren artean. Horrela aitortzen du Osasunaren Mundu Erakundeak (OME) bere Elikadura-erregimen, jarduera fisiko eta osasunari buruzko mundu-estrategia txostenean, non esaten duen dieta osasungarriak eta jarduera fisikoa eskolan sustatzea funtsezkoa dela haur-obesitatearen izurriaren aurka borrokatzeko.
Azken urteetan aurrerapenak egin dira eskola-jantokietan frutak eta barazkiak sartzeko, baina oraindik badira beste aukera-gune batzuk elikadura osasungarriaren sustapenean aurrera egiteko. Testuinguru honetan, Innobasquek Ikastetxeentzako Gidaliburu Praktikoa sortu du (beherago jaits daiteke) eta bizi-ohitura osasungarriak sustatzeko Gosasun mugimenduaren parte da
Haurrek bazkaritan fruta-ale gehiago kontsumitzea bilatzen duen ekinbide baten xehetasunak jasotzen ditu Gidaliburuak, eta Innobasqueko bazkide diren lau ikastetxerekin lankidetzan egin da: Axular Lizeoa Kooperatiba Elkartea, Begoñazpi Ikastola, Carmelitas Sagrado Corazón eta San José de Calasanz. Horien ekarpenari esker, ikasgelan fruta kontsumitzeko jardunbide egokiak identifikatu dira, baita oztopoak ere, eta ateratako ikasgaiak gidaliburu praktiko honetan sartu dira, tresna erabilgarria ikastetxe, eskola eta ikastoletarako, hamaiketakoan fruta jatea sustatu nahi badute haur- eta lehen hezkuntzako ikasleen artean.
Ikastetxeek proiektuan duten kolaborazioari esker, jatorrizko ideien inguruan iritziak trukatu eta aberastu egin dira, eta jardunbide egokiak identifikatu dira, adibidez: Begoñazpi ikastolaren Fruta Eguna, San José de Calasanzen Frutoteka, Carmelitas del Sagrado Corazón ikastetxeko Do you like fruits edo Axular Lizeoko haurren partekatzeko fruta-kaxa.
